22 જૂન 2019ના રોજ માન્ચેસ્ટર ખાતે કાર્લોસ બ્રેથવેટ 101 રને આઉટ થતાં ન્યૂઝીલેન્ડ વેસ્ટ ઇન્ડિઝ સામે 5 રને જીત્યું હતું. તે પછી તેઓ ટૂર્નામેન્ટમાં એક પણ મેચ જીત્યા નથી. તેમ છતાં તેઓ ટીમ ઇન્ડિયાની જેમ ચેમ્પિયન બનવાથી માત્ર 2 કદમ દૂર છે. વર્લ્ડકપ 2019ની સેમિફાઇનલ-1 એટલે કે ભારત અને ન્યૂઝીલેન્ડ વચ્ચેની મેચ માટે ઉત્સાહનો માહોલ દરેક પ્લેટફોર્મ ઉપર જોવા મળી રહ્યો છે. ટાઇટલ ફેવરિટ ભારત સારી લયમાં છે અને તેમના માટે વિરાટ કોહલીના કહ્યા અનુસાર આ અન્ય એક મુકાબલો જ છે. બીજી તરફ પોતાની છેલ્લી ત્રણેય મેચ હારનાર ન્યૂઝીલેન્ડની ટીમ પાસે વરસાદી વાતાવરણ, તેનો ફાયદો ઉઠાવવા ટ્રેન્ટ બોલ્ટ અને લોકી ફર્ગ્યુસન જેવા બોલર્સ અને કેન વિલિયમ્સન જેવો લીડર છે. વર્લ્ડ કપમાં સાતમાંથી 6 સેમિફાઇનલમાં હારનો સામનો કરનાર કિવિઝને હળવાશથી લેવાની ભૂલ વિરાટ કોહલી કરે એમ નથી. જયારે 6 સેમિફાઇનલ રમીને 3 વાર ફાઇનલમાં પહોંચનાર ટીમ ઇન્ડિયાને ચોથી વાર ફાઇનલમાં જતા કેમ રોકવી તે પ્રશ્ન કેન અને કંપનીને સતાવતો હશે. હેડ ટૂ હેડ: વર્લ્ડકપમાં ભારત કિવિઝ સામેની 8માંથી 3 મેચ જીત્યું અને 4 મેચ હાર્યું છે. જયારે 1 મેચમાં રિઝલ્ટ આવ્યું ન હતું,.તેમજ ઇંગ્લેન્ડ ખાતે કિવિઝ સામેની ત્રણેય મેચમાં પણ ભારતનો પરાજય થયો હતો. પરંતુ કહેવાય છે ને મેચ દરમિયાન ભૂતકાળ નહીં પરંતુ વર્તમાન પ્રદર્શન કામ આવે છે. કોહલીની ટીમનો તાજેતરમાં કિવિઝ સામે દેખાવ સારો રહ્યો છે. ન્યૂઝીલેન્ડને તેમના ઘરઆંગણે 4-1થી હરાવ્યા પછી આ મેચમાં કોહલી અને કંપની એજ આત્મવિશ્વાસ સાથે મેદાને ઉતરશે. વેધર અને પિચ રિપોર્ટ: માન્ચેસ્ટરમાં વરસાદની સંભાવના છે. આખો દિવસ વાદળછાયું વાતાવરણ રહેશે. તાપમાન 18થી 20 ડિગ્રી સેલ્સિયસની આસપાસ રહેશે. અહિયાં ટૂર્નામેન્ટની 5 મેચ રમાઈ છે અને બધી મેચ પ્રથમ બેટિંગ કરનાર ટીમ જીતી છે. પ્રથમ બેટિંગનો એવરેજ સ્કોર 323 છે. ભારત અહિયાં 2 મેચ રમ્યું છે. પાકિસ્તાન સામે ભારતે 336 રન કર્યા હતા, જયારે વેસ્ટ ઇન્ડિઝ સામે 267 રન કર્યા હતા. ટીમ ઇન્ડિયાએ બંને મેચ સરળતાથી જીતી હતી. બીજી તરફ ન્યૂઝીલેન્ડે આ ગ્રાઉન્ડ ઉપર એક માત્ર મેચમાં વેસ્ટ ઇન્ડિઝ સામે 291 રન કર્યા હતા અને 5 રનના નજીવા માર્જિનથી જીત્યું હતું. શું ભારતે કેદારને રમાડવો જોઈએ?: જાધવે કિવિઝ વિરુદ્ધ 29ની એવરેજથી 9 વિકેટ લીધી છે. આ દરમિયાન તેણે 5 કરતા ઓછાની ઈકોનોમીએ રન આપ્યા છે. કેન વિલિયમ્સન અને ટોમ લેથમ 2-2 વાર તેના શિકાર થયા છે. કિવિઝ સામે તેનો દેખાવ જોતા ટીમ મેનેજમેન્ટ તેને દિનેશ કાર્તિકની જગ્યાએ રમાડવાનું ચોક્કસ વિચારશે. ટીમ ન્યુઝ ભારતીય ટીમની બોલિંગ લાઈન-અપ તેમની પ્લેઈંગ 11 નક્કી કરશે. ટીમ કેદાર જાધવને રમાડવા ઉત્સુક હશે તેમ જણાય છે. તેના આગમનથી ટીમને છઠો બોલિંગ વિકલ્પ મળે છે. તે ઉપરાંત રવિન્દ્ર જાડેજા અને ભુવનેશ્વર કુમાર બંને પોતાનું સ્થાન જાળવી રાખે છે કે કેમ? તે જોવાનું રહેશે. ભારતની સંભવિત પ્લેઈંગ 11: લોકેશ રાહુલ, રોહિત શર્મા, વિરાટ કોહલી, ઋષભ પંત, એમએસ ધોની, કેદાર જાધવ, હાર્દિક પંડ્યા, રવિન્દ્ર જાડેજા, યૂઝવેન્દ્ર ચહલ, મોહમ્મદ શમી અને જસપ્રીત બુમરાહ બીજી તરફ કિવિઝ માટે નિર્ણય લેવો પ્રમાણમાં સરળ રહેશે. તેમની પ્લેઈંગ 11માં લોકી ફર્ગ્યુસનની ટિમ સાઉથીની જગ્યાએ વાપસી થશે. તે સિવાય અન્ય કોઈ ફેરફાર થાય તેમ જણાતું નથી. ન્યૂઝીલેન્ડની સંભવિત પ્લેઈંગ 11: માર્ટિન ગુપ્ટિલ, હેનરી નિકોલસ, કેન વિલિયમ્સન, રોઝ ટેલર, ટોમ લેથમ, જેમ્સ નીશમ, કોલીન ડી ગ્રાન્ડહોમ, મિચેલ સેન્ટનર, મેટ હેનરી, લોકી ફર્ગ્યુસન અને ટ્રેન્ટ બોલ્ટ